中環出更：續掌公大 黃玉山未踏局長路
早前港大同中大校長都分別宣布唔再續任，尋日公開大學就宣布，校董會批准現任校長黃玉山續任，新任期由下年四月一日開始至二○二一年三月，為期三年。適逢政府換屆，現任教育局局長吳克儉（吳得掂）又話唔撈，曾經係教育局局長大熱人選嘅黃玉山依家再獲公大續約，唔通意味唔會入熱廚房出任局長？
黃玉山一向公職多多，除咗擔任公大校長同埋港區全國人大代表之外，喺現屆政府上任前，仲一度被傳會做教育局局長添！但後來有人就傳出，話黃玉山係地下共產黨黨員，再加埋當年國民教育科事件鬧得熱烘烘，情況咁混亂，最後唔知點解就變咗時任考評局主任嘅吳得掂出任教育局局長。
仍未確定會否翻兜
吳得掂早前話喺政府任期屆滿後就收山唔做，教育局局長呢個燙手山芋又唔知花落誰家呢？近年同教育有關嘅議題都備受爭議，睇吓吳得掂，做乜衰乜，愈做就愈唔掂，咁黃玉山會唔會翻兜做局長？但佢再續任公大校長三年，睇嚟似係唔會出任局長嘞！之但係世事無絕對，係咪翻兜？大家拭目以待喇！
卓妮