落車避過一劫 「我唔覺得好彩」
【本報訊】「好多人話我好好彩，我唔覺得自己好彩！」上水馬會道烈火焚車慘禍，車上原載有「兄弟班」四人，出事前三分鐘在粉嶺祥華邨落車的阿聰，被視為甩難「幸運兒」，事發兩日後，他現身向東網記者真情表白內心世界，提及老友兼同事非死即傷，一度泣不成聲，「生存嘅人，係慘過死咗嘅人！」他內疚地說：「如果我無落車，可能唔會發生意外，因為我係最清醒嗰個。」
自責稱如在場或可免慘劇
人稱「阿聰」的林先生（卅一歲），現身向東網記者剖白心聲。阿聰稱，他和死者陳俊傑最為老友，「同佢識咗十幾年，做sales嘅時候識」，與獲救的霍雅倫相識三年，與身亡的判頭郭原生認識三個月。
講起慘禍，阿聰傷心哭泣，對於自己的甩難更加傷心，他含淚自責若非提前下車，可能會避免慘劇：「我唔覺得我好彩」、「可能當其時喺架車度，我係最清醒嗰個，（如果未下車）我可以控制到個情況」。
為霍被指是司機抱不平
阿聰哽咽道：「多謝兩位救霍生嘅兄弟，起碼令我無失去晒所有人，我知霍生想返轉頭救人，好彩兩兄弟制止佢」，而且「咁大火，都好難救，希望佢都唔好自責」。他亦替霍感難過：「已經係一個傷者，仲要畀屈係司機，好似講到佢害死兩個家庭，我覺得好唔公平，同埋我哋都無咗一個上司同一個好朋友，變咗佢依家心情好難平復，心理創傷好大。」
對失去十多年感情的好兄弟陳俊傑，阿聰連日來徹夜難眠，「好friend好熟，一齊轉工，平時會食吓飯，篤吓波，但依家少好多，佢始終有家庭，仲有兩個女，一個三歲一個一歲，雖然佢老婆有做嘢，但都好徬徨」，希望廣大市民能捐款予其家庭，助其渡過難關。阿聰說，四人中兩死一傷，因為與霍是拍檔，現時工作靠他一個人處理，故現時用工作來麻醉自己。