「等，寂寞到夜深，夜已漸荒涼，夜已漸昏暗」。歌都有得唱啦，等待係無奈兼痛苦嘅，如果等嘅係救命嘅醫院，仲要等到頸都長都係得個唔湯唔水嘅急症室咁大把，咁就無奈痛苦都不足以形容，簡直係草菅人命吖。
講緊嘅之唔係天水圍醫院囉。講咗N年，千呼萬喚之下，天水圍今年初終於有第一間公立醫院嘞，點知好睇唔好食，除咗到家陣都未有住院服務，就連急症室都係尋日至正式投入運作，仲要係朝八晚四有限度運作嗰隻，想廿四小時都有急症服務咩？唔係唔得，好彩嘅話最快明年底啦。咁即係話，天水圍居民要病就趁早，萬一半夜三更先嚟頭暈身（聲火），點算？
喂，病魔上門邊有時間之分o架，急症室每日只有三分之一時間運作，如果急症室閂門後有急病，到頭來又係要跨區睇醫生，點止延長病人痛苦咁簡單吖，延誤治療隨時死得人o架。搞成咁，唔使問阿貴都知又係人手不足嘅問題啦！該院行政總監係咁講嘅，天水圍醫院目前只有三百多名員工，醫護人員佔三分之一，無法兼顧更多服務，如果要開埋床位同埋提供二十四小時急症服務，起碼要有逾千名人手，所以大家只好繼續等吓先喇。
咁都未算喎，最諷刺係當初醫管局諗住天水圍醫院可以起分流作用，點知家陣掉番轉，正因為天水圍醫院人手捉襟見肘，搞到屯門醫院及博愛醫院要加床接收更多病人，十個煲七個蓋咯喎，唔怨聲載道至奇。屋漏偏逢連夜雨，最近屯門醫院頻頻爆出醫療事故，年初至今最少六宗，搞到區議員鬧爆新界西聯網人均資源太低，質疑人手係唔係去晒天水圍醫院嗰度，實情係天水圍醫院都自身難保，一味挖東牆補西牆，點會唔出事吖。
所以話啫，本港公營醫療千瘡百孔，醫療事故長爆長有，醫護人員質素每況愈下固然係原因，但講到尾都係拜資源分配不均同埋人手不足所賜。港府話就話喺未來十年會投放二千億元、增加五千多張病床及九十四個手術室，又話會加強培訓人手同挽留人才，講就容易咯，一來培養人手需要時間，二來更多私院加入市場搶人，勢必令公院人手不足雪上加霜，加上人口增長及人口老化冇停過，供應永遠追唔上需求，個死結咪始終都係解唔開囉。
最離譜嘅係，公院服務質素冇改善之餘，當局仲夠膽死打劫市民荷包，密謀急症室大幅加價，基層看病只會難上加難嘅咋。冇符啦，香港地生老病死皆不易，衣食住行樣樣難，悲情嘅點止天水圍，直情係全港七百多萬市民吖！