政情：憂公投洩密 阿王促私隱署跟進
佔領運動發起人、港大法律系副教授戴耀廷有份發起嘅「2017特首選舉民間全民投票」問題多多，雖然早前曾因網絡安全問題而被個人私隱專員公署要求停止運作，但「23萬監察」發言人王國興（阿王）認為有關投票系統仍然存在私隱問題，甚至嚴重干預於本月二十六日舉行的特首選舉，尋日到私隱署要求繼續跟進事件，並要求公署轉告選舉事務處處理。阿王於會面後透露，私隱專員接納有關投訴並指會繼續跟進。
阿王喺上月底曾到公署投訴，並於本月初接獲公署回覆，回覆指會督促有關機構喺投票後銷毀所收集嘅資料、未獲證據證明有任何人士喺是次投票所收集嘅數據作追蹤和分析等。但阿王指出，雖然戴耀廷稱投票目的係「立體展示民意，推動公眾參與」，但民主300+曾表示會以投票結果作綑綁投票，佢認為投票係違反原來嘅收集目的。
指未說明「獨立第三方」身份
同時，佢又指戴耀廷仍未說明負責儲存個人資料「獨立第三方」嘅身份，甚至有指投票所用嘅Telegram程式會被入侵。佢與公署代表會面後亦透露，公署每日有派人跟進投票，並會把佢尋日所提出嘅理據，轉交個人私隱專員黃繼兒同負責調查嘅人員。