政情：同東華有淵源何湛回贈牌匾

何湛（左）同丁新豹（右）喺馬場先難友紀念碑圖片前留影。

丁新豹話九十九年前跑馬地馬場發生一場大火，死咗六百幾人，當年東華就喺大球場後山起咗個墳場安葬死難者，呢個墳場嘅總設計師何想就係何湛嘅阿爺，其中馬場先難友紀念碑仲喺前年被列為法定古蹟。

• 何湛將個牌匾送番畀東華。（陳嘉順攝）

何湛笑稱對嗰場大火梗係冇印象，不過當年東華送咗個《規畫周詳》致謝牌匾畀阿爺。眼見個牌匾愈嚟愈殘舊，加上馬場大火即將踏入一百周年，於是佢喺兩年前就將個牌匾送番畀東華，翻新之後成個靚晒，佢仲好興奮咁展示收藏喺相機內嘅牌匾相。丁新豹就讚東華喺保護古物檔案方面做得好好，可與官方互補不足。