政情：劉國勳有車冇牌 靠老婆做柴可夫
立法會議員劉國勳未有車牌，家中都擁有私家車。但佢並唔係好似另一位議員陸頌雄咁，考牌期間已經信心爆棚而買定車，而係因為佢太太呂迪明有車牌，難怪唔考車牌都有私家車喇！
鍾意搭巴士乘機休息
家住粉嶺嘅劉國勳，經常要過海去立法會開會，所以間中都會有學車嘅念頭出現。不過，佢始終鍾意搭巴士，因為一程車直達立法會，而且期間有時間休息，毋須好似揸車般費神留意路面情況咁話。
除咗巴士夠晒舒適、方便外，太太有時都會遷就佢而擔當司機，難怪劉國勳唔覺得有學車嘅迫切性喇！不過，其實佢太太都講過希望佢學車，因為可以做吓乘客輕鬆啲，而劉國勳都對自己學車有信心，因為做咗多年乘客，直言已經熟路同道路規則，只係少咗份動力啫！
話說佢幾年前係有去運輸署申請報考車牌o架，點知到場先知要有住址證明，唔知係咪嗰次白行一趟，先搞到連僅餘嘅學車動力都冇埋呢？