政情：曾鈺成唔選特首執番條命

曾鈺成尋日接受民主黨前主席劉慧卿嘅訪問時，自爆啱啱喺二月下旬做咗「通波仔」手術，喺血管內放置咗六個支架，直言如果當初決定參選，就一定唔能夠咁快接受手術。佢解釋，因為唔知自己情況有幾危險，所以參選一定會選擇「可以拖一定拖」去應對，而唔會好似依家咁快接受手術，所以佢決定唔參選，最開心嘅人係太太咁話。

佢更透露，醫生喺手術期間發現佢其中一條血管「收到好窄」，甚至「無血到」，情況非常危急，更表示有關狀況若非喺手術期間出現，相信已經好大機會死亡，難怪佢會形容自己「執番條命」喇！

原來佢決定快啲做手術係同冇得選特首有關。曾鈺成話曾向知道北京意圖人士打探口風，而所得回覆係參選唔會獲得支持，形容自己當時「放下心頭大石」，因為當日不時就有人鼓勵佢出選，但因得知不獲支持後認為「出都冇用」，既然中央對出選有保留，就選擇唔考慮同作罷參選。

笑言自己「好易選到」

雖則係變相被勸退，但佢仍然對自己充滿信心，稱自己享受選舉，如果有份參加選舉論壇都「幾過癮」，仲話只係擔心自己參選會當選喎，因為自己「好容易選到」，睇嚟佢仍然心癢癢喇！

其實曾鈺成早喺一二年已有意參選特首，當時佢曾公開表示意向，但竟然喺十日後改口，稱因為時間過於倉卒，無法完成政綱同提升民望，所以經考慮後都係唔參選。佢喺舊年立法會任期屆滿後裸退，又話自己淨係搞智庫出謀獻策，及後被多次問到係咪選特首都不置可否，含糊其詞，原來仲係想選嘅，好彩被勸退啫，否則命仔不保呀！