中環出更：馬浩文潮拍360仔女爭住玩
潮流興拍360影片，勝在可以三百六十度全方位睇得一清二楚，夠晒現場感，記錄影像之餘，又記錄埋感覺，你都咪話唔過癮呀！香港義工聯盟常務副主席馬浩文尋日出席聯盟嘅新春聚餐時提到，自己係香港拍360影片嘅第一代，但佢自認唔係大師級，拍360係貪佢夠晒方便，一家人去旅行，個個都影到晒。
馬浩文鍾意拍片，連帶屋企嘅小朋友都好鍾意拍，佢就大讚八歲嘅大女夠創意，排行第二嘅五歲仔就夠專注，都係各有所長，連埋三歲細女三個都有共通點，就係未能掌握拍360嘅技巧，因為一手攞部機，一手都要睇顯示屏，對小朋友嚟講都相當有難度。
年輕人對科技咁有興趣，佢同另一位常務副主席蔡加讚就打算出年搞個比賽，係用VR360度拍短片，主題係「香港：被遺忘的美好」，希望吸引年輕人發掘香港靚嘅一面，仲會提供埋器材同教學，強調呢個比賽唔會動用到聯盟收到嘅善款嘅。
蔡加讚帶大女做義工
問加讚有冇帶仔女一齊做義工？佢透露曾經帶過大女探訪老人家：「想帶佢感受吓，去過一次探訪長者，長者見到佢好開心，最初佢有少少怕醜，因為平時一係喺屋企，一係返學，一去到佢撲落我度，後來熟落咗就打招呼，我一定會再帶佢去，佢依家講嘢都好好笑。」
講到新科技，副主席張芯瑜、蒙美玲同副秘書長彭芷君都大呻依家科技日新月異，要學識都唔係咁容易。張芯瑜坦言，有時唔識上網有唔明等等，都要靠九歲囝囝教番自己點樣用，又話囝囝接觸科技多，依家唔少遊戲都整得好靚，佢亦唔會禁止囝囝玩，否則囝囝可能就會同朋友冇話題o架啦！不過都要考試成績好或寫字寫得靚，先有得獎佢玩o架！
主席譚錦球就話冇乜接觸過VR，但都會去了解吓，佢都覺得新科技轉得好快，需要花啲時間去學，但係就覺得唔算太難學喎。
卓妮