正所謂斷人衣食猶如殺人父母，反對派政客係又拉布唔係又拉布，搞到工程三日打魚，兩日曬網，工人隨時飯碗不保，呢筆帳向邊個追討，唔使功夫茶多講喇啩！
係咁嘅，立法會財務委員會嚟緊禮拜五開會，審批涉款超過一百二十億港元嘅基本工程儲備基金整體撥款，署理行政長官張建宗尋日呼籲議員實事求是，以大眾利益為依歸，爭分奪秒，早日通過撥款。佢又話，基金涉及超過九千個項目，當中八千多個正在進行中，一旦撥款未能趕及四月一號前批出，將會有萬多名工人無法出糧。政客為反對而反對，簡直係生累朋友死累街坊。
上屆立法會拉布氾濫成災，搞到乜嘢正經事都做唔到，成個香港雞毛鴨血，估唔到今屆情況衰多幾錢重。立法會開波近半年以來，財委會一共召開七次會議，只係批出五個項目咁大把，工程項目更加一項都未批過，家陣仲有二十個大大小小項目排緊隊，當中唔少係民生工程，如果畀拉布再拖一拖，到頭來犧牲嘅都係全體市民利益咋。
阿崩叫狗，愈叫愈走，高官叫拉布政客「高抬貴手」，盞嘥心機捱眼瞓。呢，有反對派議員爆響口到時會建議加入「鬆綁條款」，亦即係將涉及橫洲等嘅撥款項目抽出另行審批。港府企硬唔會將項目分拆之餘，財委會主席亦話唔排除會剪布，成件事點樣收科，冇人話得埋，但可以肯定嘅係，反對派政客拉布已經拉上癮，未來只會變本加厲，夕陽政府施政只會更加寸步難行。
工程撥款可唔可以如期通過，仲要睇過至知，但拉布延誤工程審批，導致部分建造業工種工人流失，就珍珠都冇咁真。當然喇，拉布禍港殃民，絕對唔止連累工人冇工開咁簡單。舊年牛頭角迷你倉大火，立法會討論《消防(修訂)條例草案》，點知因為拉布，拖到今個月至三讀通過。又好似將軍澳警區升格咁，原本兩年前落實，結果又係因為拉布而胎死腹中。政客拉布拉到連市民生命財產安全都懶理，直頭草菅人命，唔怪得內地官媒都睇唔過眼出聲，狠批拉布為香港「製造成噸傷害」。
當然喇，蒼蠅不叮無縫的蛋，一日最衰都係官僚無能予人口實，就講今次拉布，如果唔係橫洲發展計劃被指縱容霸佔官地兼夾諮詢黑箱作業，畀位人入，反對派想玩嘢都冇咁易。
始終都係嗰句，政府無能、政客無良，香港就係咁畀佢哋夾手夾腳拖死，市民直頭冤過竇娥，再咁樣落去，唔理邊個特首上場都好，香港都一樣係冇運行嘅咋！