政情：收料站：立會諗四招 防官員拉布

話說每逢立法會開大會，議員都可以就自己關注嘅議題提出口頭質詢，政府必須派出官員到立法會回應，有時官員答問題時講到水蛇春咁長，無非都係「拖字訣」，令議員冇時間問問題。立法會議事規則委員會就想出四招防止官員拉布，包括將官員答問題嘅時間剔除喺口頭質詢限時之外，咁樣官員就冇誘因去拉布，議員又可以多「表演」機會嘞！

每逢立法會大會，議員都可以提出口頭質詢，但係連同議員提問、官員答覆同埋其他議員嘅跟進提問，每條口頭質詢嘅時間都唔可以多過廿二分鐘，如果遇上官員拉布，每條質詢就只係得番三至到四個議員可以作出提問。

議事規則委員會就防止官員拉布同增加議員提問機會提出四個建議，包括議員進行口頭質詢時毋須再讀出早已以書面形式提交嘅問題；限制質詢問題嘅篇幅；官員作主體答覆嘅時間唔包括喺質詢時間內；以及就每位議員跟進提問時間設限。有關建議料最快下周就會諮詢全體議員。

選立會主席須聲明國籍

另外，早前立法會主席梁君彥國籍風波搞到「一鑊泡」，議事規則委員會達成初步共識，建議下屆立法會主席選舉時，參選人要就其國籍及居留權事宜作出法定聲明。梁君彥真係「累街坊」呀！