政情:今日你上鏡:白色情人節生B女 林博話會錫晒佢

適逢白色情人節,九龍城區議員林博囡囡喺尋日出生。林博尋日就上載咗兩張囡囡嘅照片,稱老婆同囡囡係佢兩個小情人,話會錫晒佢哋添!

林博接受查詢時就話,太太喺星期日開始見紅,尋日等到子宮開咗之後就推入產房,作為跟得老公嘅佢,放低晒所有工作陪產,仲入埋產房幫手剪臍帶添!見證囡囡出世一刻,林博話佢同太太都忍唔住喊咗出嚟。

乳名「藍藍」 寓意胸襟廣闊

咁BB改咗名未?林博話之前同太太討論過,不論出生嘅BB係男定女,都會稱為「藍藍」,因為「藍藍」代表藍天,寓意小朋友日後胸襟廣闊,藍色亦係佢當年參選區議會時用嘅顏色。

不過,暫時「藍藍」只係乳名,林博要同家人商討之後先會決定囡囡全名。佢又話會向區議會啲同事偷師,學下點分配工作同家庭生活喎。

第一手消息請下載on.cc東網iPhone/iPad/Android/Windows Phone Apps