政情:吳得掂民望衰到尾 波叔升呢即插水

現屆政府民望長期低迷,管治團隊嘅表現備受抨擊,如今任期倒數最後三個幾月,最新嘅民意調查結果發現,夕陽政府嘅大部分司局長支持度下跌,部分官員嘅最新民望更加見紅、直插谷底,民望包尾嘅官員就當然係劣迹斑斑、不嬲都墊底嘅教育局局長吳克儉(吳得掂)喇,但勢估唔到最近「升呢」做財政司司長嘅陳茂波(波叔),蜜月期話咁快就過去,預算案出爐之後,民望即刻插水。睇怕呢班問責官員做到任期屆滿,都攞唔番個尾彩o架喇!

袁國強支持率淨值負數

根據港大民意研究計劃喺本月六號至十號進行嘅民調,成功訪問咗逾千名市民,結果顯示喺三名司長當中,除咗政務司司長張建宗(小肥張)嘅評分錄得輕微增長之外,曾因接任財爺而民望一度反彈嘅波叔同律政司司長袁國強嘅評分均下跌,波叔嘅最新評分低見三十八分,較上次減少九點四分,結果又顯示波叔嘅支持率淨值為負百分之二十四,喺成個問責團隊中排名尾三,民望之低已直逼長期墊底嘅吳得掂,而袁國強亦不能幸免,除咗評分下跌外,支持率淨值亦再跌兩個百分點至負百分之七。

司長唔掂,局長就更加唔得掂!吳得掂、民政事務局局長劉江華同創新及科技局局長楊偉雄嘅支持率淨值都繼續維持喺負數,吳得掂同劉江華嘅支持率淨值更分別錄得負百分之五十六同負百分之廿八之低,吳得掂嘅支持率更由上次調查嘅百分之十五再跌至百分之十一,佢嘅表現更被評為「拙劣」。以佢做乜衰乜嘅情況下,睇嚟喺任期結束之前,大有機會支持率跌至單位數字。

另外,政制及內地事務局局長譚志源、運輸及房屋局局長張炳良同保安局局長黎棟國嘅支持率,都較上次調查大跌了七至十一個百分點,支持率淨值都只係介乎喺百分之五與百分之十五之間。

問責班子嘅民望喺咁嘅跌勢底下,任期剩番三個幾月貨仔,睇怕都好難挽回劣勢嘞!

第一手消息請下載on.cc東網iPhone/iPad/Android/Windows Phone Apps