中環出更：華服藏玄機 麥美娟自嘲中史差
港獨思潮冒起，唔少教育界人士都話係源於年輕人唔了解歷史，亦有啲年輕人就認為中史科好悶，不感興趣，社會上就中史應否獨立成科仍然爭拗不休。立法會議員麥美娟早前喺一個活動上見到一套華服之後，亦有感而發，自嘆自己嘅中史唔夠叻。
麥美娟早前參加夫子廟會，見到在場人士都悉心打扮，着咗傳統華服，而其中一套華服深深吸引佢。邊款華服？就係「錦衣衞」嘞！仲話着上錦衣衞華服嘅年輕人余先生對此深有研究，單單喺佢呢身服裝就學到好多嘢。
錦衣衞服裝繡上「飛魚」
呢件服裝有乜玄機呢？麥美娟話驟眼睇起嚟，好多人都會以為余先生身上嘅服裝繡上嘅係龍，但當時只有皇上先可以着龍嘅服裝，龍嘅次一級係「蟒」，外形似足條龍，但只有四爪！而錦衣衞身上嘅叫「飛魚」，有龍頭魚尾同四爪，頭部嘅觸鬚係向下嘅。
解釋完一輪之後，佢就話：「真可惜當年沒有這麼生動的去了解中國歷史，如果唔係我嘅中史應該好叻！今天真是獲益良多！希望中國源遠流長的傳統文化，可以繼續傳承！」咁講，係自認中史差吖？抑或係暗指中史科嘅教學方法唔夠活呢？
卓妮