有「醫神」之稱嘅唐代名醫孫思邈講過︰「人命至重，有貴千金。一方濟之，德逾於此。」有人話醫生唔係謀生嘅職業，而係助人嘅志業，正正就係呢個道理。
可惜吖，理想很豐滿，現實卻很骨感。大家有眼見，香港地醫療事故鑊鑊新鮮鑊鑊甘，不知製造幾多人間悲劇。呢，話口未完又爆一單喇。一名患高血壓、高血脂及糖尿病嘅七十二歲老婦，舊年六月因為腹痛同嘔吐到屯門醫院急症室求診，雖然醫生為老婦量血壓，發現上壓兩度超過二百，但院方淨係安排病人接受肺部X光檢查及測血糖就打發對方出院，結果唔夠一日病人就喺家中因心臟病暴斃。
有醫生就講得啱嘞，高血壓、高血脂等慢性病人血壓過高，驗血同照心電圖等都係指定動作，最低限度病人出院前應該幫佢量多次血壓，確保處於合理水平，特別係老人家，心臟病有時會出現類似腹痛徵狀，更加要小心為上，家陣求其打發病人出院，唔使問阿貴，肯定有人疏忽做漏嘢喇。
每次公院爆大鑊，當局例牌打官腔，今次亦唔例外。醫管局話非常關注事件，明白家屬對醫療程序有疑問，又話將深入調查事件。不過大家都係唔好抱太大期望咯，事關當局次次都係大事化小，小事化了，再唔係將個波推畀死因庭，到頭來上至高官，下至前線醫護，都係無人問責，犯錯零成本咯喎，又點會有阻嚇力吖？
話時話，今次屯院斷錯症事件可能只係冰山一角，仲有幾多醜聞尚未曝光，真係冇人話得埋。試諗吓，呢單嘢隔咗差唔多一年至曝光，好可能係家屬睇到近排接二連三有關醫療事故嘅報道，發覺唔對路至作出投訴。又難怪嘅，病人交得條命畀醫生，除咗相信佢哋專業判斷，根本別無選擇。醫生疏忽大意，唔係開錯腦就係割錯腎，唔係輸錯血就係打錯針，你話點對得起病人？
講真，社會用咁高成本培養醫護人員，提供咁優厚嘅待遇同社會地位，自然要求佢哋有更高嘅職業道德水平。即使唔講白衣天使、仁心仁術咁高大上，人同此心，心同此理，掉番轉嗰個病人係醫生嘅屋企人，你估佢會唔會求求其其，左右不分吖嗱？冇錯，公立醫院前線人手緊絀，七個蓋要冚十個煲，但如果醫護唔攞個心出嚟，而只係抱打工心態，就算增加幾多資源，事故一樣陸續有來嘅咋！
咪話功夫茶唔警告，內地三日唔埋兩日就有病人家屬擸刀擸棍踩上醫院鬧事，搞到醫生要戴埋頭盔返工，講到尾就係因為醫患之間失去互信。醫療事故繼續爆不停，呢一幕遲早喺香港重演！