探射燈：政府乏支援 冇錢冇環保
回收商為減低營運成本，違法將回收籠和其他作業用具放置於行人路或行車線上，更當街將垃圾分類；有環保人士指該種現象在其他國家或城市並不常見，又指問題緣於政府對業界支援不足，望政府能增撥資源，不但能支持回收業，亦能改善公共衞生問題，一舉兩得。
利潤低 着重節省成本
「喺台灣，唔會有人當街將收返嚟嘅垃圾分類，佢哋會用車收晒啲垃圾先。」環保觸覺總幹事譚凱邦指，台灣回收業人士會將各種可回收垃圾統一收集到工廠，再做分類工作；相反，本港的回收業界將「分類」環節放得較前，做法不具效率而且影響市容。
不過，無論做法如何，他認為問題緣於政府對回收業界支援不足所致，「回收業本身利潤唔高，從營運角度考慮，佢哋梗係要諗點節省成本，如果政府可以畀多啲資助呢啲對環保有幫助嘅產業，佢哋唔使周街擺之餘，公眾地方亦都會衞生咗。」
