政情：陳學鋒先斷指筋 再遇詐騙電郵
中西區區議會副主席陳學鋒尋日做咗黑仔王，首先離奇地因為着衫而整斷手指筋，其後又收到詐騙電郵，果然係禍不單行吖！
陳學鋒尋日上載屈曲嘅左手尾指，以及經治療後嘅相片，更寫上「著（着）件衫就斷條筋」。呢個斷筋原因令人嘖嘖稱奇，唔少人都覺得難以置信，留言反問佢係咪着盔甲先搞成咁。
換衫變入廠 需數月愈合
佢接受查詢時話尋日早上換衫後，左手尾指就變成無法伸直，不過就唔覺痛，所以咪去睇家庭醫生，點知醫生叫佢去醫院穩陣啲，好彩院方話情況類似打籃球「篤魚蛋」，只係甚少見因着衫搞成咁啫。依家陳學鋒就要佩戴護托約兩至三個月，畀受傷嘅尾指伸直同愈合，所以佢都大嘆要慢慢適應喇！
喺手指受傷後，佢又收到詐騙電郵，稱有嚟自以色列嘅人將其帳戶密碼更改，如果非佢本人作出更改就應回報問題咁話。陳學鋒就話封電郵似層層，好彩見到電郵地址有古怪先無中計咋！