政情：覓地建購物城 象哥五度撞板

象哥話啱啱開始有邊境購物城嘅構思時，搵咗新界鄉議局前主席劉皇發同副主席張學明等人幫手搵地，對方相當有心，好快就介紹咗一塊地畀佢，點知原來嗰塊地係一塊保育地，唔可以發展。之後鄉親又接連搵咗幾塊地畀佢，結果分別因為係魚塘、高架橋底、有數個祖墳，通通都唔能夠發展。其後，又再搵到一塊車行嘅用地，本來租約期滿，點知原來又已經簽咗新租戶。

開幕延遲 租期愈縮愈短

話說當時象哥都以為搞唔成o架喇！點知好好彩，喺青聯活動上見到新鴻基執董郭基煇等人，講起自己搵唔到地嘅慘況，對方即刻提起有塊地曾經入過紙想做商場，不過仲未搞得成，象哥就即刻去傾，對方本來都擔心，會唔會被人話連水貨都撈埋，於是象哥就諗出，有賺就用嚟做善事，對方亦同意，咁先搞得成。

至於購物城只係簽咗三年租約，但開幕日期一再延遲，令人憂慮開幕後，租期可能只係剩下不足一年，加上業主又再申請，想喺嗰度興建大型商場作為永久商業用途。象哥就話唔擔心，估計要興建大型商場最少需時五、六年，相信期間都會繼續租畀佢哋。

爭取今年七月上旬啟用

至於有網民質疑係咪當時肯一蚊租畀新田邊境購物城，係為咗有助依家再提建大型商場嘅方案，象哥就認為每件事都會有人講意見，業主僅收一蚊租，該處若作停車場，本身有可觀租金收入，依家都蝕咗好多錢，佢認為如果做到雙贏亦唔錯，而且對方申請做永久商場，根本要做好多改動，亦唔可以直接用番新田購物城嘅設施。

象哥話會爭取喺七月上旬開幕，但就未必能趕及七月領導人訪港前開到嘞！佢透露，如果撞啱嗰幾日開，警方人手未必足夠照顧到咁多方面喎。