中環出更：搶答教育政策 蔣麗芸想做局長？
繼早前要求議員「望住我講嘢」後，立法會教育事務委員會主席蔣麗芸（Ann）尋日主持會議期間，又同另一議員鄭松泰交鋒！
話說尋日嘅會議討論學生生涯規劃議題，教育局局長吳克儉（吳得掂）簡介政策後，鄭松泰質疑局方推行嘅生涯規劃模式如同職業先修課程，仲問「主席，咁即係我冇理解錯啦……係職業先修體驗啦」。吳得掂未嚟得切回應，阿Ann竟代為回應，指政策係提供實習機會。
鄭松泰睇到「O晒嘴」
聽到阿Ann代局長答問題，鄭松泰驚訝到「O晒嘴」，問佢「係咪想做教育局局長？」呢個時候，吳得掂亦即刻插嘴回應，但鄭松泰對吳得掂嘅回應都係唔收貨，再次提出質疑，呢次阿Ann就冇再為局長代答，只係叫鄭松泰「陣間自己再問局長」。
卓妮