政情：錢大康擬聘百教授 打造浸大國際化
本港多間大學校長任期都將於今、明兩年屆滿，各大學都籌備搵新校長之際，香港浸會大學就唔搵校長搵教授。事關浸大校長錢大康上任不足兩年，任期有排都未滿，佢仲滿腹鴻圖大計打算聘請一百名教授，專注做醫藥、健康方面嘅研究同課程，要將浸大打造成國際大學咁話。
專研健康範疇課程
浸大日前舉行六十一周年校慶酒會，錢大康被問到未來浸大有咩發展大計時，佢就立即話要請人。佢解釋，浸大喺中醫、中藥、藥物研發、體育等各方面都表現唔錯，呢啲都係同健康相關嘅範疇，依家大家愈來愈注重健康，所以佢哋未來都想做多啲呢方面嘅研究同課程。
講到近來本港傳媒業難做，年年培養唔少傳理系學生嘅浸大，會唔會擔心出路呢？錢大康就話其實只係商業模式轉型，各媒體更注重網絡世界，佢哋嘅課程亦會與時並進，唔使太悲觀喎！