政情：廠商會搵CEO (目及)中楊立門
曾任康文署署長嘅香港中華廠商聯合會（廠商會）原行政總裁梁世華於去年底病逝後，其遺缺一直懸空至今。我哋收到風，廠商會會長李秀恒早前向「AO歌王」、民政事務局前常任秘書長楊立門（Raymond）招手，打算請佢做行政總裁。由於Raymond仍處於退休高官再就業嘅「冷河期」，所以佢已經向政府申請再就業，若獲得批准，相信最快上半年就可以返新工。
消息透露，上月底廠商會幾位高層已正式同Raymond面試，大家對佢都好滿意，即扑槌決定請佢。Raymond出任過多個政府部門，包括工業貿易署署長、發展局常任秘書長及民政事務局常任秘書長，其中以工貿署嘅業務同廠商會比較相關，恐有利益衝突。不過，Raymond於○六年已離開工貿署，至今已超過十年，所以相信佢獲批過檔廠商會嘅機會好大。
雖然李秀恒曾經講過，想打破搵退休高官做行政總裁嘅慣例，於內部培養及提升管理人才，但係最終都係要向退休高官埋手。據聞廠商會喺梁世華放假養病期間，已開始物色接任人選，一度向七年前退休嘅港府駐粵經濟貿易辦事處前主任梁百忍招手，不過梁百忍早已從商搵真銀，依家出任一間上市公司嘅行政總裁，故此謝絕邀請。
李秀恒：楊立門係人選之一
我哋向李秀恒求證，佢證實搵過Raymond傾過，但仍然要等政府批准，目前仲未落實。佢強調搵過其他人，Raymond只係眾多人選之一。至於Raymond就話唔回應上述傳聞。
Raymond於二○一四年七月提早退休，當時聲稱退休後要認真發展歌唱興趣，包括幫人唱歌籌款，甚至將唱歌發展為第二事業。後來佢真係寫歌、開慈善演唱會，得閒又接吓即時傳譯工作，日子似乎過得幾優游自在。不過，Raymond咁後生，冇理由就咁退休唔做嘢，政壇就流傳佢或於新特首上場後重返官場，不過都要睇吓邊個做特首嘅，如果合作唔嚟真係嗌交多過食飯，唔知係咪因為咁，Raymond寧願去廠商會搵真銀好過呢？