港獨思潮近年沉渣泛起，愈演愈烈，國家領導人終於忍唔住拍案而起，喺政府工作報告裏面首度狠批港獨冇出路。冇錯，港獨「毒港」的確係自殺，之但係睇吓班友平時指點江山嗰種威風法，點似冇出路呀，前途似錦就真！
想知香港點解會搞成咁，不妨聽吓特首候選人鬍鬚曾尋日噏乜。佢話港獨係「偽議題」，唔值得討論喎。中央呢頭喊話，鬍鬚曾嗰頭唱反調，唔怪得參選之路一路紅燈高照喇。鬍鬚曾點諗佢自己至知，功夫茶想講嘅係，過去幾年港府正正係因為呢種不以為意，聽之任之嘅態度，最終令港獨勢力坐大。
大家有眼見，幾年前遊行示威有人高舉龍獅旗，港府當冇件事；大學刊物出現鼓吹港獨文章，港府當冇件事，直到獨派政客舊年喺立法會補選獲得高票至如夢初醒，話要整「確認書」DQ獨派嘅參選資格，結果確認書係廢嘅，大批獨派分子堂而皇之殺入議會。好嘞，北大人見你搞唔掂，不惜親自出手釋法幫手掃場，點知司法覆核又係做啲唔做啲，家陣議會魚龍混雜，自決派、勇武派、本土派……明獨暗獨樣樣齊，講到尾都係港府縱容惹嘅禍。
本來呢，經歷七十九日佔領之亂，牛鬼蛇神一次過大現形，港府正好趁機打一場殲滅戰，可惜事實啱啱相反，班幕後黑手至今依然逍遙法外，而律政司遲遲唔採取行動嘅藉口居然係「證據太多」。旺角暴亂更加離譜，就算鏡頭影住用磚頭扑濕差佬，都係判感化了事，暴力襲警喎，咁都放生，唔係鼓勵港獨係咩呀？
講開司法亂象，真係火都嚟埋。最近有打正旗號主張港獨、聲言發動暴力革命嘅政黨召集人提出選舉呈請，居然獲批法援。正如有人話齋，中央已經釋法向社會傳遞明確訊息，「播獨」者唔能夠成為立法會議員，依家用公帑資助佢哋打官司，盞令佢哋更加肆無忌憚嘅咋。法援署慷納稅人之慨，有冇問過市民先？
冇錯，香港地任何人都有權依法上訴，之但係獨派分子同外部勢力關係密切，打官司缺水咯喎，同洋大人單聲就得，唔使搵納稅人公帑較飛啫。事實上，港獨分子真係水頭充足㗎，如果唔係，嗰兩位已被DQ嘅小學雞點會搵到英國星級大狀幫手上訴吖。再講吖，絕大多數香港人反對港獨，如今法援署大筆一揮，要納稅人幫港獨分子埋單，咁做即係助紂為虐，點講都講唔通。
一句講晒，港獨思潮由無到有，由虛火到燎原大火，都係港府養癰遺患之過。港府「消獨」乏力，唔通又係要北大人自己收拾殘局？