政情：姚銘被偷相開戶 fb「通知」助識破

開設facebook（fb）帳戶並唔困難，但因為太易開戶，現時網絡上就充斥唔少虛假帳戶。北區區議員姚銘早前就遭人盜用相片開戶竟渾然不知，多得fb嘅先進偵測科技識破，主動通知佢咋！

fb早前通知姚銘，懷疑有人盜用佢嘅相片作頭像。該帳戶用姚銘嘅舊照，但姓名完全唔同，個帳戶開設不足一個月，亦冇上載過任何嘢。姚銘就大讚fb厲害，單憑一張相就偵測出假冒帳戶，但佢諗極都唔明，點解有人會用佢張相？唔通因為影得好睇？佢笑笑口話唔信呢個可能性囉！

另外，姚銘講起當年就讀屬於Band 5嘅職業先修中學，雖然Band 5畀外界嘅感覺係讀書唔叻，不過依家同學全部都有一門手藝。佢認為讀唔到書嘅同學只係精力旺盛，並非頑劣，當年佢最鍾意喺校內玩捉迷藏，都聽聞過有同學用炮仗炸廁所，睇嚟佢嘅中學生涯都幾精彩喎。