政情：南韓公廁「冇味」黃士心解謎
南韓樂天集團供地予南韓軍方部署美軍薩德導彈防衞系統，掀起內地民眾反對聲音，亦有內地專家指事件或會引發中韓經貿關係「硬着陸」。早前我哋見到旅遊界老行尊黃士心，佢就話暫時未有港人抵制南韓嘅情況出現。
對於港人近年熱愛到南韓旅遊，黃士心指事件之後未見港人到南韓旅遊嘅興致大減，反問記者會唔會驚添！佢又形容香港人算係幾大膽，對於旅遊非常熱衷，所以唔擔心嚟緊嘅南韓團有太大影響。佢仲透露，自己喺早前十二月都去咗韓國滑雪，仲發現咗一樣嘢，就係除咗日本之外，韓國嘅廁所一樣好乾淨，背後係有原因喎。
屬私人地方 更注重清潔
黃士心話相比起台灣同其他東南亞地方，南韓嘅廁所算係特別清潔，連男廁都「冇味」，事關當地所有廁所都係「私有化」嘅，即係話如果你要買嗰度嘅地，就要買埋幅地隔籬個廁所，換句話講佢哋所有「公廁」都係私人而唔係公家嘅，難怪打理得特別好啦！