政情：波哥抗拉布 狂加會縮小休
立法會財務委員會目前正審議備受爭議嘅基本工程儲備基金整體撥款，由於民主派議員不滿政府將橫洲建屋計劃同其他有爭議嘅項目綑綁處理，所以喺會上拉布阻止撥款通過。據知，財委會主席陳健波（波哥）唔單止會瘋狂加會嚟剪布之外，仲會出新招縮短會議之間嘅小休時間，務必用盡所有時間開會。
財委會自今屆會期開始以來就拉布不斷，包括朱凱廸、鄺俊宇同埋姚松炎等民主派議員，先後就問責官員加薪同基本工程儲備基金整體撥款拉布，而後者更因為係咪剔除橫洲發展等廿多項工程嘅爭拗，至今仍然係拉鋸當中。受拉布影響財委會至今僅在民主派突襲失敗下通過問責官員加薪，同埋無爭議嘅免費優質幼稚園教育計劃一筆過撥款兩項，仲有四十多項撥款仍然大塞車，等待審議。
三月份將加會20小時
面對會期只淨四個月時間，據講波哥已經打算以加會抗拉布。據了解，波哥已經諮詢建制派議員，由三月十七日起嘅財委會，逢星期五將加開兩節四小時會議，星期六就加開三節六小時會議，僅三月份就會加會二十小時，而瘋狂加會將會直到所有撥款通過先結束。
由於建制派對加會都「牙痛咁聲」，據知，波哥又有另一招，就係壓縮每節會議之間嘅小休時間，將星期六第一節與第二節之間原本十五分鐘嘅休息時間改為五分鐘；而第二節至第三節之間原本約一個多小時嘅休息時間，改為十五分鐘。而星期六嘅會議將會喺下午三點前完成，之後建制派議員就有下午嘅時間可以落區。
雖然波哥出新招抗拉布，正所謂「你有張良計、我有過牆梯」，民主派又唔知會諗到啲乜嘢新招抗剪布呢？老實講，近年因為拉布成風，加會已經成為立法會新常態，其實歸根究柢都係要解決拉布問題，否則只係逼議員加會，都係治標不治本囉！