中環出更：大飽歌劇癮 李鋈麟法老王上身

呢身法老王嘅裝扮睇嚟花費唔少喎，但李鋈麟就話身上嘅服飾係喺網上購買，買完之後自己再加工，好似個頭飾咁，佢就自己加厚咗啲海綿嘞！佢都係想盡量令造型更加神似啫！

馬陳家歡造型由老公挑選

講起睇歌劇，主席馬陳家歡第一套同老公馬浩文睇嘅係《歌聲魅影》，又透露佢一身荷里活巨星柯德莉夏萍嘅優雅造型，係老公幫佢挑選嘅。馬浩文就認為喺舊式歌劇院睇歌劇，同新式歌劇院有所分別，好似喺倫敦睇氣氛莊嚴又華麗，而喺一啲新式歌劇院睇則會有新科技同投影效果，兩者感覺截然不同，佢個人就兩種都好享受。

總理馬清揚就恰巧以《歌聲魅影》男主角造型出現，指印象最深刻一幕係男主角撐住船唱歌，佢仲話識唱晒劇入面咁多首歌，有一排喺屋企成日唱，不過叫佢表演佢就笑笑口話驚個場啲人會即刻走晒喎！

總理李曠怡同女友Anita就話《芝加哥》服飾最容易搵到，不過睇睇吓李曠怡嘅造型仲有幾分似上海灘嘅許文強，原來讀番書嘅佢都有睇過上海灘，仲話依家歌劇同粵劇一樣，都會加插搞笑情節，愈接觸愈覺有趣。

呢日現場啲布景板好有心思，用董事局成員照片製成劇院廣告，副主席陳祖恆同太太沈依紅喺布景前留影，沈依紅仲大爆老公套白色西裝係五年前佢哋結婚嗰套喎。

東華將董事局成員照片改成搞笑版劇院廣告，陳祖恆（左）同太太沈依紅（右）都要影番張相留念。

馬陳家歡（左）指身上造型係老公馬浩文（右）幫佢挑選嘅。