政情：外國網媒造假：曾蔭權自殺
被控公職人員行為失當罪成、判入獄廿個月嘅前特首曾蔭權，由荔枝角收押所「轉倉」到赤柱監獄至今大約一星期，本來風平浪靜，但尋日突然有外國網媒惡作劇，假傳曾蔭權前晚喺監獄自殺，仲言之鑿鑿話懲教署職員尋日朝早發現佢曾經服毒咁話。不過消息人士澄清絕無此事。
指其前晚倉中服毒
該網媒以英語大字標題，聲稱「香港前特首曾蔭權自殺」，內容引述監獄人員稱，尋日朝早喺獄中發現曾蔭權，醫生檢查過之後證實佢前晚服毒，但唔知自殺原因，亦唔知係咪因坐監引致壓力有關云云。
懲教署發言人接受查詢時，話唔評論個別人士嘅情況。不過消息人士證實係流料，話成單嘢都係假，完全係惡作劇咁話。其實該網媒過去亦曾報道多位名人嘅假死訊，包括前菲律賓總統拉莫斯。至於入獄後獲唔少親友探望嘅曾蔭權，尋日就唔見有親友前往探監。