中環出更：楊岳橋自爆着過裙幾舒服
星期三就係三八婦女節，香港基督教女青年會尋日趁機舉行「三·八女青日」暨「香港女聲Glocal Y」嘉許禮，表揚一班年輕女性領袖，立法會議員楊岳橋（Alvin）亦獲邀出席分享。嚟到呢個以女性為主題嘅活動，Alvin自然成為焦點，更自嘲係「花瓶」，仲自爆試過着裙，有機會親身了解吓女士着裙嘅感覺喎！
講到男女平等，Alvin話香港女性嘅社會地位唔低，好多高官要職都由女士擔當，本身係律師嘅佢更感慨話，依家讀法律系嘅學生七成係女仔，預計二十年後法律界都係女人玩晒咁話！講講吓，佢自爆讀書時學校要着蘇格蘭裙，雖然同女士平日着嘅裙唔同，但都叫做感受過，涼浸浸咁，夏天着應該幾舒服喎！
女性雖然喺職場表現好硬淨，但係私底下可能又希望男士風度翩翩，有粗重工夫就主動幫手，唔知男士會唔會覺得唔公平呢？Alvin同香港科技大學副教授黃岳永就認為，呢啲係男士嘅DNA。黃岳永仲話，當你愛太太或者家人時，又點會介意主動幫手，拎吓袋乜嘢都好，完全唔會覺得蝕底，佢仲話自己每個周末都會親自買餸下廚，做住家男人。
鍾嘉穎赴美探討婦女地位
同場仲有立法會議員容海恩及女聲Glocal Y嘅參加者鍾嘉穎。香港依家有二十五萬剩女，容海恩就話唔太擔心，話身邊仲有家人同朋友，生活好自在。鍾嘉穎就會喺本月中同另一參加者李宛融前往美國紐約，參加聯合國婦女地位委員會會議，同各國代表交流。
卓妮