清潔香港運動搞咗幾十年，可惜香港地愈來愈烏煙瘴氣，環境愈來愈惡劣，唔使講第樣，淨係睇吓遍地開花嘅垃圾山就知咩事，山頭有山頭傾倒泥頭，街邊有街邊丟棄大件垃圾，真係睇見都眼冤。
面對有關亂象，官老爺做過啲乜？環保署官僚尋日出席立法會會議時話喎，早前喺全港多個非法堆填及非法棄置廢物黑點安裝監察攝錄系統，有效打擊非法活動，希望將系統擴大為恒常機制並增加安裝點，另外仲唔排除會以「裝假狗」方式增強阻嚇作用添。
聽落好似係威係勢，實際係咪咁理想就唔係咁樂觀喇。大家應該記得，當年沙士過後當局喺全港各區衞生黑點裝設閉路電視，結果幾年貨仔就靜雞雞拆晒，一切又回復舊貌。仲有吖，話就話法例規定非法棄置廢物嘅重犯者最高可被罰款五十萬元，但好多時即使斷正都只係罰一千幾百了事，有人就講得啱嘞，喺出面叫車運走建築廢料分分鐘都唔止呢個價，與其話收阻嚇作用，不如話係變相縱容好過。
最好笑嘅係，環保署官僚大腳傳中，一嘢賴落法庭判處刑罰太低。講真，司法不公，輕罪重判，重罪輕判呢啲嘢大家都見怪不怪，之但係好似立法會議員話齋，當局如果唔滿意法庭判決，大可以上訴。其實講到縱容非法傾倒，官老爺只係五十步笑百步，近四年嚟環保署收到六千六百幾宗有關政府土地非法棄置建築廢物嘅投訴，成功截獲並以傳票方式檢控嘅只有二百幾宗咁大把，連零頭都唔到，違法幾乎零風險咯喎，情況唔失控至奇喇。
非法傾倒問題有幾猖獗，天水圍泥頭山係最典型例子。事件被揭發十幾年，官府一直闊佬懶理，直到泥頭山堆到廿幾米高、傳媒介入至拿拿臨補鑊票控罰款，奇就奇在涉事者一直唔肯清走泥頭，淨係壓實泥頭同鋪種植被敷衍了事，當局竟然照樣收貨。咁即係點，即係只要閣下畀得起錢，成個山頭垃圾任倒唔嬲。唔好忘記，泥頭山唔單止影響環境衞生，更加造成安全隱患，萬一唔好彩重演深圳塌泥慘劇，呢隻鑊官老爺孭唔起o架。
正所謂，只要精神不滑坡，辦法總比困難多。有人建議當局設立基線資料庫，等公眾可以了解非法傾倒涉及嘅範圍，同埋係咪恢復原有地貌；亦有人建議私人工程引入類似公共工程合約嘅運載記錄制度，追蹤泥頭去向，呢啲無疑都值得當局考慮，怕就怕家陣夕陽政府，官僚抱住多一事不如少一事嘅hea做心態，咁就講乜都嘥氣。
港府成日畀人鬧冇神經、冇靈魂，如果連垃圾咁簡單嘅問題都搞唔掂，你話成班垃圾官僚唔拎去堆填仲有咩用吖！