政情：陳家強財爺無份做返校有出路

繼香港中文大學校長沈祖堯將於明年六月底離任，以及香港大學校長馬斐森最遲明年一月要走人之後，香港理工大學校長唐偉章、香港嶺南大學校長鄭國漢、香港教育大學校長張仁良以及香港科技大學校長陳繁昌嘅任期，都相繼喺明、後年屆滿。換言之，六間大學都要開始招聘新校長。雖然張仁良同鄭國漢已表明有意續任，但能唔能夠得償所願仲係未知之數。至於唐偉章及陳繁昌已分別喺理大同科大出任校長多年，兩人亦已屆退休之齡，相信換人機會好大。

學者出身 曾有機會任城大校長

今屆政府多名政治問責官員都係學者出身，當中包括陳家強。佢喺美國留學，亦曾於美國嘅大學任教。一九九三年科大成立之初，陳家強即加入科大商學院，其後更成為科大工商管理學院院長。○七年陳家強原本有機會「更上一層樓」，出任城市大學校長一職，不過喺最後關頭，城大校長選舉「流產」，令佢無緣成為城大校長，但就喺同年加入政府，擔任局長至今。

鬍鬚曾辭職後，外界原本以為陳家強可以「升呢」做司長，點知就畀陳茂波上咗位，陳家強唔知會唔會深深不忿呢？不過政壇就係咁，嬲都冇用喇！正值六所大學獵頭之際，唔知陳家強會唔會考慮重返校園呢？話時話，近年本港大學校園愈趨政治化，大學校長少啲政治智慧都唔掂，好似陳家強咁喺官場磨練過嘅學者，隨時成為大學獵頭熱門人選添！