中環出更：三老鴿密會漢奸黎 又謀攪局？
壹傳媒黎智英（漢奸黎）經常同民主黨（白鴿黨）老鴿聚會「攪局」。繼上月情人節前夕，有「李漢奸」之稱嘅白鴿黨創黨主席李柱銘同「民主阿婆」前政務司司長陳方安生去漢奸黎屋企後，李漢奸尋日又再帶同白鴿黨老鴿何俊仁（AV仁）同李永達到黎宅密會漢奸黎。咁啱過去三日高等法院審理四名立法會議員宣誓司法覆核案，唔知漢奸黎同李漢奸係咪又趁機諗計搞事呢？
示威者帶海報列黎罪行
尋晚六時許，李漢奸同AV仁、李永達乘坐由漢奸黎司機駕駛嘅七人車抵達黎宅，坐後排嘅李漢奸同AV仁木無表情，坐前排嘅李永達就笑口噬噬，形成好大對比。三人喺黎宅逗留咗近三小時，至夜晚九時許先至離開。三人走時面紅耳赤，疑似飲大兩杯。
另外，尋日再有示威者去到漢奸黎何文田寓所附近示威。下午大約一時半，一男一女抵達黎宅，展示印有漢奸黎樣貌以及「肥佬黎佔中黑手、八大惡行」等字句嘅海報，更力數漢奸黎「八大惡行」，包括「勾結外部勢力」、「佔中金主」、「重金操控泛民」、「唱衰香港警察」及「離間中港關係」。
卓妮