夕陽政府時日無多，無所作為大家都預咗咯，但咁係咪代表乜都奉旨hea做，連自毀法治招牌都在所不惜呢？淨係嗰班佔領搞手及幕後黑手咋，拖咗咁耐都仲未落鑊，法律面前人人不平等咯喎，所謂法治之區咪即係笑話。
往事不堪回首，一場佔領鬧劇，搞到社會撕裂，法治蕩然，香港無日安寧。好似早排七警案判刑，一石激起千重浪，咪就係拜司法不公所賜囉。冇錯，七警打人的確係唔啱，判囚亦冇人話唔應該，但都要心服口服至得（口架），當大家睇到「警察拉人，司法放人」屢屢上演，佔領人士唔係無罪釋放就係守行為，襲警之徒唔係判社服令就係判緩刑，罰得最重嗰個都係坐監十個月咁大把，咁就難怪唔少市民都感到憤怒，紛紛為判監兩年嘅七警喊冤咯。
最惡頂嘅係，四十幾名佔領搞手及幕後黑手至今逍遙法外，唔止得閒飲啖茶、食個包咁梳乎，仲扮晒蟹話對於未被伏法感到慚愧喎，明剃港府眼眉啫。鬼咩，律政司檢控拖拖拉拉，連「證據太多」都搬埋出嚟做藉口，好似當人傻仔咁款，牛鬼蛇神有恃無恐咯喎，梗係天不怕地不怕喇。嗱，日前立法會開會，唔少議員除咗為七警抱不平，仲批評律政司司長袁國強遲遲唔做嘢，質疑係咪有心放生，要求當局加快起訴工作，證明公道自在人心。
咁又係呀，早在佔領落幕之初，警方已表明會喺三個月內完成調查並將證據提交律政司，點知雙方一直大玩太極神功，案件一拖經年，如果話冇人包庇，小學生都唔信。呢，尋日又有團體因為不滿佔領搞手落鑊無期，走去警署報案要求徹查，律政司一味採取拖字訣，已經到咗天怒人怨嘅地步，你話袁國強該當何罪吖？你話律政司係咪應該改名叫亂政司吖？
可能佢老哥自己知自己事喇，之前明示暗示唔會留任下屆政府，至於任內未完成嘅工作，佢就話明要搞掂高鐵「一地兩檢」呢個燙手山芋，否則走都走得唔安樂喎，但對於檢控佔領搞手就隻字不提，擺明側側膊唔多覺。喂，「一地兩檢」固然唔應該留畀下屆，但收拾佔領爛攤子同樣係呢屆政府嘅責任，袁國強卸得就卸，拖得就拖，真係豈有此理。有人話佢同其中一位佔領搞手係大學校友，所以落唔到手，實情係點，大家金睛火眼（目及）到實嘞。
始終都係嗰句，法之不行，自上犯之。香港近年之所以亂象叢生，講到尾就係港府有法不依，雙重標準。法治係社會穩定嘅基石，港府自毀長城咯喎，邊個做特首都係冇運行嘅咋。