政情：怒插政府房地分拆泛民賊喊捉賊
本屆政府上任前已表明房屋問題係「重中之重」，但公屋輪候時間屢創新高。政府快將任滿，民主派議員批評政府負責覓地同建屋嘅兩個決策局唔協調，建議下屆政府考慮重組運輸及房屋局同發展局，其實現屆政府上任時曾提出架構重組，建議改組為房屋、規劃及地政局，但最終因泛民拉布而拖垮，依家竟然怒插政府房地分家，賊喊捉賊，建制派都睇唔過眼，鬧番轉頭。
立法會尋日討論促請政府重新檢視及按需要進行架構重組嘅議案，提出議案嘅梁繼昌話運房局管轄嘅範圍上好繁重，而運輸同房屋所需嘅專業知識又不盡相同，建議將土地、房屋同規劃合組於同一決策局，將運輸分拆到另一個局，從而令施政更暢順。
公民黨楊岳橋亦指運房局既要管交通又要管房屋，即使唔熟悉公共行政嘅人都會覺得不合理，加上房屋會涉及屬發展局管轄規劃政策，呢種分工必然會令效率下跌。佢又話新政府上任時未有經正常諮詢程序，就將五司十四局嘅政府架構重組方案提交立法會，結果連部分建制派議員都倒戈反對。
當年拉布拖垮架構重組
眼見班泛民喺度賊喊捉賊，民建聯嘅陳克勤就指摘泛民當年反對政府架構重組，令用來解決住屋問題嘅藥唔能夠存放喺同一個百子櫃入面，要分散喺唔同嘅藥材舖當中，要花極多時間先「執到一劑藥」，最終令三十萬輪候公屋嘅小市民受影響。