假難民問題搞到香港雞毛鴨血，內地將香港當成「排毒馬桶」係一大原因，可能睇到民怨沸騰知衰啩，粵港兩地近期加大打擊人蛇力度，總算做出些少成績喇。
嗱，尋日粵港兩地執法部門嘅頭頭雲集政府總部，舉行聯合會議，保安局局長黎棟國係咁講嘅，內地同香港自從去年初合作打擊邊界偷渡活動至今，取得顯著成效，去年下半年本港平均每月截獲一百一十名非華裔人蛇，較前年平均每月三百二十人大幅下跌六成五，情況令人鼓舞喎。
冇錯，人蛇偷渡數量明顯減少，內地加強堵截應記一功，事關南亞人蛇借內地做跳板，一旦成功踏足本港，咁就唔止可以攤大手板攞人道津貼咁簡單，仲可以打黑工搵快錢，甚至勾結黑幫作奸犯科，香港簡直永無寧日。家陣內地肯正視問題，幫手堵截，可以話係應有之義。之不過咁，當局執法出名一陣風，一旦唔能夠持之以恒，人蛇偷渡潮好快就會死灰復燃嘅咋。
唔係亂噏o架，運動式執法不嬲係內地特色，進行時風風火火，完結後就關人個關。講真，道高一尺，魔高一丈，人蛇集團唔係傻嘅，佢哋明知家陣兩地嚴打，梗係暫時減少活動，等到風聲過後先至重張旗鼓啦。再講吖，本港平均一個月截獲過百名人蛇，即係平均一日三、四個，點計都唔算少，黎局長講到沾沾自喜咁款，真係咄咄怪事。
唔係咩，全亞洲咁大，點解南亞人蛇度度唔去，偏偏淨係睇中香港？新加坡夠係國際金融中心啦，有冇人蛇問題困擾？台灣同樣係華人地區，有冇爆發假難民問題？遠嘅唔講，內地同澳門一樣加入國際公約，但人蛇頂多當內地係跳板，唔會久留；澳門係就係間中截獲人蛇，但數目就同香港差天共地。講到尾，香港成為人蛇天堂，咪就係拜港府假仁假義所賜囉。
大家有眼見，有人蛇偷渡來港犯案，但只要舉手申請免遣返聲請，即刻好似有免死金牌護體，待遇一百八十度逆轉，唔止唔使捲鋪蓋返鄉下，仲可以享受貴賓級招待，政府仲出埋錢幫佢哋打官司告自己添。試過有畸士勝訴，每羈留一日獲賠一千元，有畸士仲獲賠逾二十萬元，好過去搶。呢啲咁荒謬嘅制度一日存在，人蛇來港誘因就唔會消失，香港想搣甩假難民天堂呢個朵都幾難。
始終都係嗰句，對假難民仁慈，即係對市民殘忍。收緊難民政策已經係大勢所趨，強如歐洲，都畀難民問題一鑊蹺起，香港只係彈丸之地，自己嘅問題尚且無法解決，憑乜嘢效婦人之仁，背上假難民呢個爛攤子呀！