政情：黃友嘉貼士：中產強積金買股票
強制性公積金管理局主席黃友嘉早前都講過，其強積金投資係進取型，投資回報唔錯，佢尋日喺積金局傳媒春茗中更進一步透露，供款十六年以嚟，三成結餘係投資回報，回報率達四成四，仲畀貼士話中產投資強積金，可考慮買股票添！
長遠投資唔係高風險
原來黃友嘉一直將強積金全部投資喺回報高、風險高嘅股票基金，購買藍籌港股，有人認為股票波動大，佢就話買股票好似坐飛機咁，一時顛簸，唔代表全程係咁。佢又話中產人士如果已經有樓，有幾百萬元資產，強積金只佔資產幾分之一，除保持流動現金同其他投資外，強積金係長遠投資，唔能夠隨便提取，因此放喺股票就唔係高風險投資。
佢又認為政府提出強積金對沖嘅畫線方案複雜，但社會認為需要解決對沖問題，商界即使唔同意，亦應該趕喺六月諮詢期前提出反建議。喺今個月中任期將屆滿嘅佢咁積極推廣強積金，睇嚟連任嘅機會相當高。