政情：波叔預算案 市民愈諗愈嬲
現屆政府任期最後一份財政預算案喺上星期三公布，臨急上任嘅財政司司長陳茂波（波叔）宣布派糖三百五十億元，即日嘅民意似乎幾正面。不過，今年庫房大水浸，但派糖力度反而「縮水」，各界事後紛紛批評波叔係「守財奴」，市民亦愈諗愈嬲，不滿瞬間升溫。最新嘅民意調查結果就顯示，預算案嘅滿意率淨值由公布首日嘅百分之十五跌到去零，反映市民對波叔嘅保守預算案唔多收貨。
被指與前任同為「守財奴」
上一任財爺多年嚟都被批評為「守財奴」，波叔喺一月接任財爺一職後，仲話會「應使則使」，令市民多咗啲期望。點知，今個財政年度庫房大水浸，財政儲備達到九千三百幾億元嘅歷史新高，但係波叔派糖反而比上年「縮水」三十七億元，立即被各界炮轟佢同樣係「守財奴」、「孤寒」，基層同中產市民都覺得佢「Hea住做」，認為佢同前任財爺無分別，都係幫唔到手。不過，波叔自己反而係預算案「受惠人士」，因為港大民意研究計劃喺預算案公布當日嘅民調發現波叔嘅評分谷底反彈，市民對預算案嘅滿意率淨值亦去到百分之十五。驟眼睇以為波叔成功過關？真相係市民第一日仲未嚟得切消化預算案。
港大民研喺預算案公布之後一、兩日再做同樣嘅民調，訪問咗五百零六人，結果發現民意明顯逆轉，受訪者對預算案嘅滿意率跌七個百分點至百分之二十六，不滿率就上升九個百分點到百分之二十七，滿意率淨值短短兩日內跌到去零。調查機構亦認為市民喺初步消化預算案嘅資訊同討論後，對預算案反應漸趨負面，尤其係政府收入多咗，但派糖反而少咗，逾半受訪者都唔認同呢個做法。
理財策略滿意率同捧蛋
至於波叔提出，包括適度有為、發展經濟、改善民生嘅三個公共財政目標，調查結果亦顯示有逾半受訪者覺得份預算案做唔到呢啲目標。另外，近七成覺得本港財富分配不均，政府理財策略嘅滿意率淨值同樣「捧蛋」。睇嚟市民對波叔呢份預算案應該係唔多收貨先啱！