中環出更：立會足球賽 容海恩落場得個樣
立法會足球隊尋日喺寒冷天氣下，同政府官員踢今屆立法會第一場聯誼足球賽。新丁議員羅冠聰、張國鈞、陳沛然同容海恩（Eunice）都有落場，Eunice仲係首位立法會足球隊女球員添！不過Eunice原來從來冇踢過波，尋日落場十幾分鐘，連個波都未掂過。咁都入到足球隊，真係幾搞笑！
Eunice話由細到大都冇踢過波，所以連球靴都係尋日朝早先買。至於乜嘢叫「越位」等球賽規則，就喺現場熱身時先至學。Eunice雖然未踢過波，但聲稱足球電子遊戲就打咗廿年，唔知落場有冇用喎！立法會足球隊前隊長陳克勤被問到Eunice表現如何，呆咗幾秒後吐出四個字「勇氣可嘉」，大家明喇！
羅冠聰幾乎踢足全場
羅冠聰係史上最年輕立法會議員，亦係立法會足球隊最年輕成員。雖然佢遲到些少，但幾乎踢晒成場球賽，完美展示咩叫「年輕就是本錢」。羅冠聰話平時大概兩星期踢一次波，多數同中學同學踢。
張國鈞就獲太太帶埋兩個囡囡撐場，卓妮見兩個小朋友相貌及身高好相似，驟眼睇仲以為係雙胞胎，其實兩人分別係四歲同三歲。
張國鈞解釋話，大女唔肯食嘢，細女又食好多嘢，所以妹妹就慢慢追上家姐喇！卓妮問一對姊妹花：「爸爸踢波叻唔叻？」兩人異口同聲大嗌「爸爸好叻」，真係甜入心。
講番場波最後以一比一打和，眾人高呼「以和為貴」，唔知係咪講緊議會上呢？
卓妮