掩蓋海堤大移位 廢官睜眼講大話

法王路易十五有句名言︰「我死之後,哪管洪水滔天。」查實今時今日港產官僚嘅心態都係差唔多,一個二個諗住過咗海就係神仙,市民吹佢哋唔脹,有乜大鑊嘢自然臭屎密冚,瞞得就瞞喇!

就好似講明做埋今屆唔撈嘅運輸及房屋局局長張炳良咁吖,今個月初視察港珠澳大橋人工島及香港接線等橋路工程嘅時候,拍晒心口話總體施工「進度良好」,又話有信心本年底可以完工。結果話口未完就被傳媒踢爆工程有重大甩漏。今次出事嘅係大橋核心工程之一、連接大橋主橋至人工島嘅一段「香港接線-觀景山至香港口岸段」工程,懷疑兩年多以嚟一直出現海堤崩塌、沙泥嚴重移位嘅情況,甚至形成一幅足足有十八個維園足球場咁大嘅「新填地」,顯示填海施工嚴重移位。咁都叫「進度良好」,簡直係擘大眼講大話。

話港府冇隱瞞事件,三歲細路都唔信。有人留意到工程開始時,路政署有定期喺網站上載填海工程地點嘅廣角鳥瞰圖,清晰顯示填海地點海岸線嘅變化,而咁啱得咁蹺去到一四年,亦即係海堤出現崩塌時,就轉為上載特寫圖,擺明博大霧誤導公眾。最離譜嘅係,路政署發放嘅船隻禁航範圍,被發現本應屬海岸嘅位置,其實已經係「新填地」一部分,船隻聽佢老點,分分鐘剷上陸地,官老爺為咗掩飾不惜搵市民安全較飛,簡直不負責任。

家陣公眾最關心嘅係,有關甩漏會唔會令完工日期進一步押後?海堤崩塌會唔會造成安全隱患?路政官僚例牌菜又係大派定心丸,強調大橋香港接線處並無擴大填海,仲將責任全部推晒畀承辦商,話要追回進度及相關工程費用,有信心大橋能如期通車。至於點解之前一直冇主動對外披露填海工程中出現海堤伸延,就話係因為對公眾安全及環境影響不大喎。

官老爺講就梗係講得輕鬆喇,弊在專家似乎唔係咁睇呢。有資深土木工程師話就算喺海岸線外圍加壓,都唔可能短時間填咁大幅地出嚟,好大可能係海底下嘅黏土不斷向外滑引致移位。話時話,大橋工程甩漏多多,由口岸人工島「飄移」,到擅改填海工序,再到今次海堤崩塌,官僚有邊次唔係傳媒踢爆至死死地氣認衰,有邊次唔係藉口多多,用一堆專業名詞嚇唬公眾(口架)!

不過咁,避得過初一,避唔過十五,張炳良如果以為搵班(口靚)出嚟擋箭就可以過骨,未免太傻太天真。多位立法會議員已經去信要求張炳良出席會議解畫,到時即管睇吓佢老哥點拆彈。