政情：發言要望主席 卿姐聞所未聞

話說卿姐尋日主持一個節目時，請來民建聯（民記）議會新丁周浩鼎（Holden）接受訪問，卿姐喺節目開始前就提到教育事務委員會主席蔣麗芸（Ann），早前喺主持會議時要求議員望住佢發言嘅事件，更扮阿Ann說話：「望住我講嘢呀！」之後更直言「我做咗二十幾年議員都未試過咁」，但作為黨友嘅Holden一直都只係笑笑口，冇為阿Ann辯護。之不過，阿Ann之後就解釋，話只係按議事規則辦事，執番正啲規矩啫！

轟特首納入防賄條例遲未落實

卿姐之後話，法院審理前特首曾蔭權爵士涉貪一案早已引起咗社會嘅關注，雖然曾蔭權當時委任由前首席法官李國能擔任主席嘅委員會，曾建議將特首納入《防止賄賂條例》第三及第八條適用範圍，但五年過去，特首梁振英政府一直「走數」，又反問民記過去有冇努力爭取過政府就此事修改法例，但Holden僅稱民記有喺背後做嘢，又指修例要作全盤考慮同檢視有冇其他可能性嚟堵塞漏洞，但被卿姐炮轟指「仲要考慮其他可能性？你哋好成日放生佢！」

卿姐更向Holden教路，指民記應該召開記者會，公開向現屆政府說雖然只剩下數個月任期，但都要把握時間將議案交上立法會，佢直指呢個議題社會早已經有充分討論，希望民記都盡快叫政府「拎（個議案）上嚟」。