政情：賣私伙籌旗覆核四子恐輸身家
自決派嘅劉小麗、羅冠聰、姚松炎同梁國雄（長毛）等，早前被政府入稟法庭尋求司法覆核，要求取消佢哋嘅立法會議員資格，其中三人尋日被高等法院駁回被拒法援嘅上訴，然而協助佢哋籌旗嘅基金，依家籌得嘅同目標款額相差大段距離。無計可施下，竟然諗住網上拍賣涉事議員嘅油畫、T恤同頭盔就可搵多一百七十萬元嚟填氹。咁啱得咁蹺，早前被取消資格嘅游蕙禎同梁頌恆，其所屬嘅青年新政尋日自爆戶口突被取消，想為上訴籌旗都唔得。喺咁嘅情況下，睇嚟佢哋隨時會輸身家嘞！
佔中發起人之一陳健民成立基金為四名議員眾籌律師費。佢尋日話基金至今籌得三百三十萬元，距離第一期目標尚欠一百七十萬元，今日起會進行網上拍賣，包括劉小麗捐出嘅兩幅油畫、姚松炎親筆簽名頭盔，以及羅冠聰喺佔領運動期間與政府官員對話時所穿嘅「Freedom Now」標語T-Shirt，希望下月底能籌夠五百萬元。
長毛獲批法援 仍需墊支逾110萬
佢又話依家預算四人嘅律師費，即使長毛獲批法援，但需要預支「墊底費」估計逾一百一十萬元，其餘三人則預計需一百萬至二百萬元，就算籌得五百萬元，亦預計首場官司完結時就會花光。
劉小麗表明唔接受判決結果，而姚松炎指政府使用公帑聘請兩位資深大律師，但佢哋就冇，批評情況構成不對等嘅壓力，又指喺呢個唔公平嘅制度下，無法彰顯法律公義。羅冠聰認為案件係香港憲政史上最黑暗嘅一面，又批評立法會主席沒有為行政干預立法會作出辯護，希望市民會支持籌款。
青政戶口被取消 游梁眾籌添難
基金唔達標，佢哋已經要攞私伙嘢出嚟網上拍賣，遲啲好可能要自己科水打官司，隨時會輸身家。拖欠立法會逾一百八十萬元營運開支嘅游蕙禎同梁頌恆亦可能輸身家，事關佢哋都有發起眾籌打官司，點知連戶口都被取消埋。
青政尋日喺facebook公布，早前接到中國銀行來電，稱其戶口已被取消，而存款亦將會退還。經過多番追問下，中銀職員僅稱未能提供取消戶口原因，亦多次重複銀行會定期檢討與客戶關係，經評估及考慮而作出取消戶口的決定，而召集人梁頌恆設於滙豐銀行嘅個人戶口亦遭凍結，青政直指中銀嘅決定嚴重阻礙組織日常運作，亦為宣誓官司籌款工作添難。