中環出更：紅樓滿載歷史 善團齊急救

彭少衍話未去過紅樓，但就知道紅樓非常有歷史價值，加上呢類歷史建築買少見少，佢亦知道紅樓附近嘅地區現時已經有一啲團體發起想夾錢買番紅樓，話雖然紅樓比較接近仁愛堂嘅服務區域，但佢話如果博愛能夠出一分力，佢哋都好願意幫忙保護呢個咁有意義嘅建築。

李鋈麟住過附近年半

轉頭見到東華三院主席馬陳家歡同李鋈麟，原來李鋈麟喺紅樓附近住過年半，佢話當年十五歲左右，喺紅樓附近做學徒修理汽車兼寄宿，紅日假期先返屋企，而由於寄宿地方同紅樓好接近，所以好熟悉附近一帶，有好多回憶喎。佢仲直言「人冇歷史同鹹魚冇分別」，好似佢哋東華三院文物館咁，就對歷史文物細微至書信都珍而重之，更何況係一棟歷史建築。

馬陳家歡（左）同李鋈麟（右）尋日參觀立法會。（徐家浩攝）	鄧錦雄及李愛平（左二及左一）與保良局主席郭羅桂珍（右二）及副主席蔡李惠莉喺立法會留影。	紅樓面臨清拆，部分善團都好關注。（資料圖片）

參觀立法會嘅仲有仁濟醫院、保良局、樂善堂同仁愛堂的一眾成員。講起紅樓，總部位於屯門嘅仁愛堂主席鄧錦雄、副主席李愛平同羅台秦亦好關注事件，本身係台灣人嘅羅台秦仲話見到之後好激動氣憤，直頭傷心到喊咁滯。佢話每年佢哋都會去紅樓參與紀念孫中山嘅儀式，每次都有幾百人參與，相比起另外興建一個博物館，紅樓呢個當年曾被用作商討或策劃革命嘅地方更有歷史價值，佢仲話如果五百萬元就可以買到呢個地方，佢都想即刻買。

卓妮