政情：私隱署指戴耀廷「特首民投」違例
本報早前率先報道，由佔中發起人戴耀廷發起嘅特首選舉公投計劃，存在私隱同保安風險，可能會令參加者嘅個人資料外洩。私隱專員公署尋日發表聲明，直指該計劃有誤導參加者同濫用其資料之嫌，違反《個人資料（私隱）條例》下嘅公平收集個人資料原則，強烈要求有關機構停止相關活動，參加者亦應停用相關嘅手機通訊程式。
涉誤導參加者 濫用資料
由戴耀廷發起嘅「公民聯合行動」，早前委託港大民意研究計劃及理大社會政策研究中心，舉辦「2017特首選舉民間全民投票」，大致係畀市民透過手機通訊程式，就各名特首參選人進行公投；若某位或多位參選人取得一定票數，真正有權投票選特首嘅選舉委員會委員，就應該畀佢哋足夠嘅提名票，送佢哋「入閘」參選特首。
該計劃一推出，已有資訊科技專家同組織警告存在漏洞同風險，投票嘅個人資料可以輕易咁被還原同識別。私隱公署尋日更發表聲明，質疑計劃未有向參加者清楚說明收集資料嘅目的、用途同合法理據，甚至有誤導參加者之嫌，相關資料同數據可能會被誤用或濫用。私隱專員黃繼兒直指該計劃違反咗法例下嘅公平收集原則，公署已就事件展開循規審查。