中環出更：一舊雲梁美芬互罵 同遭熄咪
立法會教育事務委員會尋日開會討論新高中通識教育科，席間議員田北辰同梁美芬均質疑通識科唔應該作為必修科，梁美芬更動議要求全面檢討通識教育科同取消通識科作為文憑試必考科目，但遭議員黃碧雲（一舊雲）質疑議案措詞係抹黑，梁美芬反指對方詆毀同誹謗，之後雙方繼續駁火，冇理會委員會主席蔣麗芸（Ann）嘅勸喻，結果雙雙被阿Ann熄咪。
蔣麗芸多次勸停不果
一舊雲質疑梁美芬喺議案中指出，「自通識教育科推行以來備受批評」，認為措詞係抹黑同不符事實後，梁美芬隨即提出規程問題，認為一舊雲嘅言論係詆毀同誹謗，要求一舊雲收回言論，又批評佢亦有教通識，「你連人批評都唔得，仲要話人抹黑」。縱使阿Ann多次話「得喇，好喇，收到你嘅意見」，但兩人仍繼續爭論，阿Ann最終熄咗佢哋嘅咪。
阿Ann話議員唔應該猜測其他議員發言動機，但佢認為抹黑一詞並非冒犯，一舊雲毋須收回言論。最終梁美芬嘅動議未獲通過。
卓妮