最近有套講怪獸家長嘅電視劇成為城中熱話，劇中角色為咗仔女讀好書無所不用其極，有人要個細路讀兩間幼稚園，有人為送仔女讀教會學校，不惜到菲律賓攞「特快」領洗紙，令唔少家長會心微笑。
有頭髮冇人想做瘌痢，如果唔係升學競爭激烈，又點會搞成咁吖。好似呢兩日展開嘅小一統一派位申請咁吖，由於今個學年適齡小一學童增加接近一成，爭崩頭嘅情況前所未有咁嚴重。天濛光擔櫈仔霸頭位就梗嘅嘞，谷仔女狂上興趣班亦係基本指定動作。有家長形容，幫仔女報小學就好似訂枱食飯咁，要不斷降低要求，到最後連乾淨少少嘅大牌檔都要等位，你話幾淒涼吖。
本地家長除咗同自己人爭，仲要面對雙非家長嘅競爭，佢哋當中有唔少係土豪，其中有人霸氣非常，話喺九龍城名校網一擲過千萬購入豪宅，仲聲大大教訓港人，話內地新移民交稅比你哋多，靠嘅係實力，當堂引發眾怒。
諗深一層，內地土豪係就係財大氣粗啲，但唔好忘記雙非童都係香港人，同其他小朋友一樣有受教育嘅權利，至於買豪宅報名校，你估有條件嘅本地家長唔會咁做咩，所以講嚟講去，成件事嘅癥結根本唔係學童嚟自邊度，而係學額長期僧多粥少，官僚應對無方。
大家有眼見，當局明知道今年適齡學童人數增加，特別係跨境學童來港就讀，更會喺今明兩年步入高峰期，冇及早規劃不特止，仲要遞表前幾日失驚無神宣布喺十個校網增加學額，又冇交代各校最新學額供應量，搞到家長大失預算。至於幾年前推出嘅跨境學童專用校網，更加係添煩添亂，激化矛盾。雙非家長埋怨仔女被「流放」到冇雷公咁遠之餘，本地家長又覺得雙非學童搶資源，搞到七國咁亂。
冇計喇，呢個政府就係咁嘅嘞，自己冇做好份工就推卸責任，轉移視線，挑動群眾鬥群眾。學額問題係咁，公屋供應不足亦淨係識得喺計分制度埋手；仲有退休保障，成日強調推行全民退保會增加年輕人負擔，製造代際矛盾。今時今日社會撕裂，真係多得呢班廢柴官僚唔少。
好多人都唔明，小一派位爭崩頭年年如是，沒完沒了，點解官僚唔做啲嘢呢？其實道理一字咁淺，針唔拮到肉唔知痛，班高官仔女個個唔係喺外國浸鹹水，就係讀本地國際學校，點會理解家長撲學位嘅苦況，話唔定睇到你班友爭餐懵，剝花生睇好戲掩住半邊嘴笑添。始終都係嗰句︰當官不為民作主，不如回家種紅薯，難為班高官仲好意思為自己加人工，知唔知個「醜」字點寫㗎！