政情：高達斌進軍傢俬業搵真銀
愛港之聲創會主席高達斌最近轉趨低調，原來佢轉型進軍傢俬業「搵兩餐」。早前我哋喺一個新春酒會見到佢，講起佢老本行原本係印刷業，但早兩年忙於愛港之聲嘅會務，令佢丟低本業好幾年，搵少咗真銀，自然要另謀打算。咁啱佢有個內地開傢俬廠嘅朋友，因資金周轉問題急需白武士，於是高達斌就入股，仲打算喺傢俬行業搵兩餐。
高達斌睇好傢俬業，皆因睇好樓市。佢話香港係國際都會，環球精英匯聚，所以樓市銷售對象唔止係香港人，而係世界各地嘅投資者。加上不斷增長嘅人口形成龐大嘅住屋需求，故樓市必定長期向好，尤其市區物業更加矜貴。有人買樓自然就要添購傢俬，所以高達斌認為傢俬業一定有得做。入股傢俬廠之後，佢銳意一展拳腳，仲喺油麻地開咗一間舖，務求吸納埋西九嘅豪宅客咁話。