政情：蔣麗芸怪招除「松」波哥一句KO
立法會財務委員會尋日召開四節、共八小時嘅特別會議，審議司法人員加薪等多項政府撥款。熱血公民立法會議員鄭松泰發言時就話本地法官面臨政治壓力。同鄭松泰已有多次「互動」，仲曾經要求鄭松泰望住佢講嘢嘅民建聯議員蔣麗芸（Ann）就再對鄭松泰出怪招，話部分議員涉及司法程序，發言唔中肯，要求議員發言前要申報有冇官司喺身，就連屬建制派嘅財委會主席陳健波（波哥）都不明所以，仲一句KO（擊倒）阿Ann。
屢提相同要求被駁回
對於阿Ann提出嘅要求，波哥本來都好聲好氣解釋，話根據《議事規則》，是否申報首要係睇議員是否涉及金錢利益，又認為議員並冇提及未被裁決嘅案件，所以裁定阿Ann要求無效。不過阿Ann就鍥而不捨，到社民連議員梁國雄發言時，又再重提有關要求，結果就畀波哥一句︰「我已經裁決！」KO，阿Ann仲即刻離場抗議。而該撥款就以卅票贊成，一票反對獲得通過。
