政情：拉布多 審批少 立會拆招牌
每個立法年度結束之後，立法會都會推出年報，為過去一年埋單計數。由前一屆立法會開始，拉布、流會成為議會新常態，令開會嘅時間愈來愈長，但通過嘅議案就逐年減少。好似啱啱過去嘅立法年度，開會嘅時數長達五百五十九小時，不過僅通過廿九條法案，而議員議案更加只係通過咗三十一條。上年度嘅拉布更加令《私營骨灰安置所條例草案》同《消防修訂條例草案》胎死腹中，所以話拉布真係害人不淺。
開會加多 通過議案反減
根據二○一五至二○一六年立法會年報，該年度共開咗三十五次大會，包括三次特首答問大會；開會時數達五百五十九小時，比前一個立法年度嘅五百一十七小時多出百分之八。雖然開會時間愈嚟愈長，不過通過嘅法案只係比前一屆嘅廿三條多咗六條，即係廿九條。至於排喺政府法案之後嘅議員議案，由前一屆成功通過六十條，變成只通過三十一條，好多由民主派議員提出嘅議案都不獲通過。
點解通過嘅法案得咁少呢？相信主要嘅原因，都係因為上一年度有議員就版權條例，同埋醫生註冊條例拉布所致，當時嘅醫學界議員梁家騮、公民黨郭家麒同工黨何秀蘭都有份拉布，梁家騮更加不惜提出十幾萬項修正案，又用點人數拉布，令到法案直至立法年度完結都唔可以成功通過。至於被政府撤回嘅版權條例，立法會都用咗成九十六小時審議，當中有三十八小時係用嚟點算法定人數，仲有五次流會。
政府請人開支 少批50億元
立法會除咗立法，另一個工作就審批公共財政。年報指，上一個立法年度人事編制，即係政府請人開支就有三百六十七億元，涉及六十四個財務建議，但比前一個立法年度批出嘅四百一十三億元少近五十億元；至於工務工程方面，上一個立法年度就批出八百八十二億元嘅撥款，比前一個立法年度一千零七十二億元大幅減少。其實立法係立法會嘅重要職責，如果議員用拉布阻礙立法，即係無盡議員責任，又點同投票畀佢嘅市民交代呢？