中環出更：羅偉立承繼衣鉢 有數得計
殯儀業充滿神秘感，而且工作性質又屬厭惡性，所以要入行絕對需要勇氣，並非人人能夠勝任。年紀輕輕嘅永福殯儀館第三代傳人羅偉立（Zack），係家族同輩中唯一選擇接手生意嘅後生仔，但當初入行原因竟然係因為收入夠高喎！
由一群參與家族企業嘅年輕人所成立嘅創二會尋日舉行分享會，邀請唔同人士分享對企業傳承嘅睇法同心得，講者有荔園主席邱達根、大家樂集團前主席陳裕光、註冊中醫師兼德善醫療集團創辦人張琛等，Zack都係其中一位講者。
太子爺冇特權 由低做起
Zack透露，原本冇諗過會承繼家族生意，但大學畢業前夕對前途感到迷惘，計過條數之後，決定喺廿二歲入行。佢解釋，呢行嘅收入按工作量計算，每兩小時就有六百元，加上死者家屬派利是，所以高峰時每日可獲三千元。雖然貴為接班人，但Zack並冇特權，試過被老師傅責罵，更要由低做起、擔任仵作，試過清潔屍體、抬棺材等。
講起做企業接班人，打工仔梗係好羨慕。創二會會長伍進超就大嘆孤獨，因為朋友會覺得佢哋係太子爺，如果佢哋工作有不如意係笑話，好彩有一班相同背景嘅人士聚埋，大家可以互相訴苦咁話。陳裕光就話，就算做公司領導人都要多聽意見，唔能夠高高在上。好似佢個仔讀中學時，同佢講快餐店嗌號碼領餐嘅方式如同監獄，佢覺得有道理，於是逐步改用顯示屏，原來呢個主意係來自一位中學生。
卓妮