係人都知，唔撈嘅打工仔係最惡嘅。好似早就宣布執包袱走人嘅運房局局長張炳良咁吖，佢老哥尋日視察港珠澳大橋工地，下巴輕輕，一口咬定大橋年底有條件通車，又死口唔認香港工程進度落後拖後腿，強調喺三地中「唔係最遲」，毫無半點羞愧之情，唔通呢啲就係「官到無求膽自大」？
即係咁，港珠澳大橋一波三折，狀況不斷，幾時通車仲係望天打卦，張局長依家就梗係可以講到實牙實齒喇，問題係年底你老哥已經不在其位，市民去邊度追你數？仲有，佢首次承認大橋主橋支出會比估算「多啲」，但問到具體數字就大賣關子，話要等三地政府商討後向立法會匯報。同樣道理喇，超支幾多都好，都係佢繼任人嘅事，到時咪又係關人個關。
至於話香港段工程冇拖後腿咯喎，只能夠對佢老哥面皮之厚寫一個「服」字。連內地官媒都老實不客氣指出，大橋通車時間取決於香港工程進度，畫公仔已經畫出腸喇。可能自知吹大咗啩，張炳良被追問到底係珠海最遲抑或澳門最遲，咪惟有以笑遮醜囉。
如無意外，今次好可能係張炳良最後一次以局長身份視察大橋工程，下次重遊舊地已經係一介平民，冇可能再好似依家咁前呼後擁，成棚人跟出跟入，唔趁依家整番場出巡騷好好享受吓嗰份官威，等幾時吖。
咁又係吖，張局長臨別秋波檢閱「政績工程」，如果唔睇港珠澳大橋而走去睇高鐵工地，幾時完工，超支幾多，一地兩檢安排幾時傾妥，一樣畀人質到面懵嘅咋。有名你叫「運輸及房屋局」，交通基建延誤超支多過食飯不在話下，耗資十幾億公帑嘅新空管系統甩甩漏漏，烏龍百出，航空安全受嚴重威脅，同樣搞到怨聲載道。至於房屋政策，公屋建造數量唔達標，無殼蝸牛上樓條龍愈來愈長；私人樓價高處未算高，市民置業夢愈來愈渺茫，管邊瓣衰邊瓣，唔怪得有口皆悲啦。
都係古人講得啱，德不稱其任，其禍必酷；能不稱其位，其殃必大。對於張炳良唔撈，外界頗多揣測，有人話係高官之間唔啱牙，但無論點都好，佢肯自我了斷，總比其他廢柴同僚有自知之明。好似有啲局長，幾乎人人喊打咁滯，都仲存僥倖之心想賴死唔走，官癮大成咁，你話係為咗服務市民，而唔係吼住下屆問責高官人工又加一成幾，三歲細路都唔信。
大家有眼見，今屆政府管治班子濫竽充數，拉雜成軍，根本就未夠班。有參選人口口聲聲當選後會大換血，係龍係蟲，仲要睇過至知。