政情：劉仲恒夫婦 身體力行撐哺母乳
唔少媽媽為咗BB嘅健康發展都會揀餵母乳，就連港鐵主席馬時亨嘅女婿劉仲恒（Kevin）都話支持，好似佢個八個月大嘅B仔就飲足半年母乳。不過，Kevin認為香港嘅育嬰設施不足，透露自己曾經試過要等足半個鐘，連B仔都瞓埋先用到間育嬰室同B仔換尿片，希望日後喺婦女事務委員會入面推動改善吓咁話。
盼推動改善育嬰設施
本身係放射科顧問醫生嘅Kevin，今年一月十五日被政府委任做婦委會新成員，佢話加入婦委會後其中一個最關注嘅議題就係推動母乳餵哺。佢話自己作為一個醫生，知道餵母乳嘅好處，所以太太馬露明都餵咗半年母乳，直到太太返工先停。佢又分享太太餵母乳嘅小點滴，話啱啱餵母乳嘅時候喺屋企用餵奶布練足兩個禮拜，確保唔會走光先出街。
雖然Kevin話香港人普遍都支持餵母乳，但太太餵母乳時都曾經畀人眼望望。仲有一次排隊等育嬰室換尿片，要足足等成半個鐘先用到，耐到B仔都瞓埋，所以希望喺呢方面可以改善吓。