政情：江貴生坐巴士 惹偷拍美女疑雲
有女子上周六喺社交網站上載照片，指有一名「肥哥哥」喺巴士上一直偷拍佢嘅睡姿，該女子李小姐望住呢位「肥哥哥」時，「肥哥哥」更「扮打機」，李小姐直斥「肥哥哥」係「癡漢」及「變態」。原來呢位「肥哥哥」就係民協深水埗區議員江貴生。江貴生喺社交網站發貼回覆，話自己當時只係用手機玩遊戲，完全體諒事主處境同心情，但就認為「不應基於他人的樣貌或體形而妄斷」，亦唔希望再出現呢種誤會。
事主fb發貼指控 圖文俱備
江貴生喺社交網站話，佢收到大量訊息，告知有人喺網上指佢喺巴士上偷影女士睡姿，圖文俱備，「保皇黨更如獲至寶，瘋傳此事」。江貴生澄清自己當時只係玩緊手機遊戲，可能因此造成誤會，強調自己只係澄清誤會，請各位唔好、亦唔應該對事主作出任何程度嘅騷擾。
我哋其後聯絡李小姐，佢話事發時完全唔知對方係區議員，只想為女性抱不平。佢認為江貴生有權承認，亦有權否認所有事實，但江貴生嘅回應的確為佢帶嚟滋擾，包括網上惡意抹黑。李小姐又話事件已過去，唔想多提喇，只希望偷拍事件可以減少。